Барандаи панҷкаратаи ҷоизаи «Тӯби тиллоӣ» Криштиану Роналду эълон кард, ки фаъолияти худро дар тими миллии Португалия ба анҷом мерасонад.
Футболбози 41-сола бо нашри як муроҷиати видеоӣ аз тасмими худ барои тарки тими мунтахаби кишвар хабар дод.
Роналду дар муроҷиати худ чунин гуфтааст:
«Рӯзе фаро расид, ки бояд пироҳани рақами 7-и тими миллиро, ки ба ҳамаи мо тааллуқ дорад, ба насли оянда супорам. Ман ҳеҷ гоҳ ин пироҳанро танҳо моли худ намедонистам. Аммо дар тӯли 23 сол шараф ва масъулияти пӯшидани он, ҳимоя карданаш ва бо он ба майдонҳои варзишии саросари ҷаҳон баромаданро доштам.
Имрӯз лаҳзаи он расидааст, ки онро ба насли оянда вогузор кунам. Қабули ин қарор осон набуд, зеро баъзе қарорҳо на танҳо бо ақл, балки бо дил низ қабул карда мешаванд.
Роҳе ба анҷом мерасад, ки моҳи августи соли 2003 оғоз шуда, зиндагии маро абадан тағйир дод. Вақте ба гузашта назар мекунам ва тамоми он чизеро, ки дар тими миллӣ аз сар гузаронидаам, ба ёд меорам, на танҳо бозиҳо, голҳо, рекордҳо ё ҷоизаҳоро мебинам. Ман одамонро мебинам.
Ман португалиҳоеро мебинам, ки дар хориҷи кишвар зиндагӣ мекунанд ва дар тӯли 90 дақиқа худро каме ба Португалия наздиктар эҳсос мекарданд. Миллионҳо португалиҳоеро мебинам, ки ҳаргиз шахсан бо онҳо вохӯрдаам, аммо онҳо бахше аз зиндагии ман шудаанд.
Зеро дар ниҳояти кор футбол на танҳо як бозӣ аст. Футбол — ин одамон ҳастанд.
Дар тӯли тамоми фаъолияти худ дар тими миллӣ ман ҳамеша кӯшиш мекардам, ки аз ҳадди имкониятҳои худ берун равам. Мехостам ғолиб шавам, беҳтарин бошам ва дар таърих ном гузорам. Ман ҳамеша нисбат ба худ талаботи баланд доштам. Ҳамеша чизи бештар мехостам ва бовар доштам, ки мо метавонем ба дастовардҳои бузургтар ноил шавем. Барои ин пироҳан тамоми қувваи худро сарф мекардам.
Рӯзҳо ва шомҳои фаромӯшнашаванда буданд, пирӯзиҳое буданд, ки ҳеҷ гоҳ аз ёдам намераванд. Ҳамчунин, шикастҳое буданд, ки то ҳол ба ёд оварданашон бароям душвор аст. Ман низ хато кардам, ман низ азоб кашидам. Лаҳзаҳое буданд, ки натавонистам ба мардуми Португалия он чизеро бидиҳам, ки онҳо хеле мехостанд. Аммо ман ҳеҷ гоҳ таслим нашудам. Муҳимтар аз ҳама, ҳеҷ гоҳ ифтихор аз намояндагии Португалияро аз даст надодам.
Дар тӯли ин солҳо ман чанд ҳақиқати хеле одиро дарк кардам. Голҳо фаромӯш мешаванд, ҷомҳо дар осорхонаҳо мемонанд ва рекордҳо дер ё зуд шикаста мешаванд. Аммо чизе ҳаст, ки вақт ҳаргиз онро аз байн бурда наметавонад — ҷойгоҳе, ки мо дар қалби мардум дорем.
Агар рӯзе тавониста бошам, ки шуморо хушбахт созам, агар голи ман шуморо водор карда бошад, ки касеро ба оғӯш гиред, ғаму ташвишҳоро фаромӯш кунед ва танҳо аз кишвари худ ифтихор намоед, пас тамоми ин заҳматҳо беҳуда набудаанд. Зеро португалӣ будан маҳз ҳамин маъноро низ дорад. Мо мушкилотро якҷоя паси сар мекунем ва якҷоя аз нав бармехезем. Мо дубора ба худ бовар мекунем.
Португалия ҳамеша ба ҷавононе ниёз дорад, ки орзу мекунанд, ба футболбозоне, ки ҳеҷ гоҳ таслим намешаванд ва ба наслҳои наве, ки бовар доранд, метавон ба дастовардҳое расид, ки то имрӯз касе ба онҳо ноил нашудааст. Зеро кишваре, ки қаҳрамонҳои навро тарбия мекунад, ҳаргиз боварии худро ба хеш аз даст намедиҳад.
Ба ҳамдастагонам аз тими миллӣ мехоҳам суханони алоҳида бигӯям. Барои ҳар як давидан, ҳар як оғӯш, ҳар як суҳбат ва ҳар як лаҳзаи хомӯшӣ пеш аз ворид шудан ба майдон ба шумо ташаккур мегӯям. Барои ҳар як пирӯзие, ки якҷоя ҷашн гирифтем ва ҳар як шикасте, ки моро қавитар сохт. Барои ман шарафи бузург буд, ки капитани шумо бошам. Аммо ҳеҷ як капитан ин роҳро танҳо тай намекунад. Шумо низ бахше аз таърихи ман ҳастед.
Ба ҳамаи мураббиён, роҳбарон, табибон, физиотерапевтҳо, ҳайати мураббиён ва дигар нафароне, ки дар тӯли солҳои зиёд бо ман фаъолият карданд, сипос мегӯям. Бисёре аз шумо ҳеҷ гоҳ дар ин аксҳо пайдо нашудаед, аммо бе шумо ҳеҷ яке аз ин аксҳо имконпазир намешуд.
Ба оилаам низ барои он ки ин орзуро бо ман тақсим кард, ташаккур мегӯям. Барои фаҳмиши шумо нисбат ба лаҳзаҳои дур буданам аз хона, қурбониҳо ва он рӯзҳое, ки тими миллӣ ҳамон ҷойгоҳеро дар зиндагии ман ишғол мекард, ки ба шумо низ тааллуқ дошт. Агар ман ба ин ҳама даст ёфтам, танҳо ба он хотир буд, ки мо ҳамеша паҳлуи ҳам ҳаракат мекардем.
Ба шумо, мардуми Португалия, ки дар гӯшаҳои гуногуни ҷаҳон зиндагӣ мекунед, мехоҳам дар суханони охирини худ боз як чизро бигӯям. Як манзара ҳаст, ки онро то охири умр дар хотирам нигоҳ медорам. Лаҳзае, ки Суруди миллии кишвар садо медиҳад. Ман ба атроф менигарам, ҳамдастагонам, минбарҳои пур аз мухлисон, кӯдакон, модарон, падарон ва бобову бибиҳоро мебинам. Португалиҳоеро мебинам, ки танҳо барои он аз масофаи дур омадаанд, то дар он ҷо ҳузур дошта бошанд.
Дар он чанд дақиқа мо дигар аз ҳам фарқ намекунем. На бошгоҳҳо вуҷуд доранд, на рангҳои гуногун, на табақаҳои иҷтимоӣ, касбу кор ва ақидаҳо. Танҳо як муҳаббат вуҷуд дорад — Португалия! Маҳз ҳамин эҳсосест, ки онро то охири умр бо худ хоҳам бурд.
Имрӯз роҳи ман дар майдони футбол бо ҳайати тими миллӣ ба анҷом мерасад. Ман бо сари баланд, ифтихор аз роҳи тайкарда ва бо дарки он ки тамоми ҳастии худро ба Португалия бахшидаам, меравам. Аммо ҳеҷ гоҳ яке аз шумо буданро бас намекунам. Ман минбаъд низ ҳар як пирӯзии Португалияро ҳамроҳи шумо эҳсос мекунам, ба ҳаяҷон меоям ва шод мегардам.
Тамоми умрамро барои он сарф кардам, ки беҳтарин футболбози ҷаҳон шавам. Имрӯз дарк мекунам, ки бузургтарин пирӯзии ман ба даст овардани ҳаққи намояндагии беҳтарин кишвар дар ҷаҳон будааст.
Барои ин 23 сол ташаккур! Барои боварӣ ба ман сипосгузорам. Барои он ки ба ман имкон додед орзуеро амалӣ созам, ки ҳанӯз дар кӯдакӣ, вақте писарбачаи хурде дар ҷазираи Мадейра аз паси тӯби футбол медавидам, оғоз шуда буд.
Пироҳани рақами 7 боқӣ мемонад, аммо ифтихор аз пӯшидани он ҳамеша бо ман хоҳад буд. Португалия ҳамеша дар қалби ман зиндагӣ хоҳад кард. То дидорҳои нав! » — изҳор доштааст Роналду дар муроҷиати видеоии худ.
Криштиану Роналду дар ҳайати тими миллии Португалия 234 бозӣ анҷом дода, 146 гол задааст. Ӯ дар футболи байналмилалӣ аз рӯи шумораи бозиҳо ва голҳо рекордҳои ҷаҳониро ба даст овардааст. Дар ҳайати мунтахаби кишвар Роналду соли 2016 қаҳрамони Аврупо гардида, инчунин ду маротиба, солҳои 2019 ва 2025 — Лигаи миллатҳои УЕФА-ро ба даст овардааст.
Рӯзи 30-юми сентябр Роналду дар пайи ихтилоф бо сармураббии тими миллӣ Жорже Жезуш аз қароргоҳи мунтахаби Португалия дар шаҳри Копенгаген берун рафт. Сабаби ихтилоф ба вақти кам гирифтани бозӣ дар рақобати Лигаи миллатҳо бо тими миллии Норвегия рабт дошт.
Роналду изҳор дошта буд, ки мураббӣ ваъда додааст, ӯро дар 30 дақиқаи охири вохӯрӣ ба майдон мебарорад. Аммо бо вуҷуди гармкунии футболбоз дар қисми дуюми бозӣ, ӯ ба майдон набаромад. Жорже Жезуш мавҷудияти чунин мувофиқаеро рад карда буд. Пеш аз тарки қароргоҳи мунтахаб, мураббӣ инчунин хабар дода буд, ки Криштиану дар бозии навбатӣ бо Дания аз ҳайати асосӣ берун мемонад.
Рӯзи 19 –уми октябр Шӯрои интизомии Федератсияи футболи Португалия Роналдуро барои 30 рӯз аз иштирок дар бозиҳо маҳрум карда, ба маблағи 255 евро ҷарима баст. Сабаби ҷазо худсарона тарк кардани қароргоҳи тими миллӣ арзёбӣ гардид.
Манбаъ: Телевизиони «Варзиш» · varzishtv.tj
