Бошгоҳи «Манчестер Юнайтед» бо мутахассиси аргентинӣ Маурисио Почеттино оид ба шартҳои асосии таъйин шудан ба вазифаи сармураббии даста ба мувофиқаи шифоҳӣ расидааст. Дар ин бора рӯзноманигори маъруф Фабритсио Романо дар шабакаи иҷтимоии X хабар додааст.
Ба иттилои манбаъ, ҳоло музокирот бо Федератсияи футболи Иёлоти Муттаҳидаи Амрико идома доранд. Роҳбарияти бошгоҳи Манчестер ният дорад аз банди ҷуброни шартномаи Почеттино истифода бурда, барои қатъи ҳамкории ӯ бо ҷониби Амрико 10 миллион доллар пардохт намояд.
Пас аз ҳалли ин масъала бояд қадамҳои расмӣ барои таъйини мутахассиси аргентинӣ ба вазифаи сармураббии «Манчестер Юнайтед» гузошта шаванд.
Қаблан хабар дода мешуд, ки роҳбарияти «Манчестер Юнайтед» рӯзи чоршанбе, 11-уми ноябр, дар Монако ҷаласае баргузор карданист. Тибқи иттилои расонаҳо, дар ин мулоқот масъалаи ояндаи сармураббии феълии даста Майкл Кэррик баррасӣ мешуд.
Ҳамин тавр, эҳтимоли тағйири сармураббӣ дар «Манчестер Юнайтед» рӯз аз рӯз бештар мавриди таваҷҷуҳи расонаҳои варзишӣ қарор мегирад. Аммо таъйини Почеттино то ҳол расман тасдиқ нашудааст.
Манбаъ: Телевизиони «Варзиш» · varzishtv.tj
