Дастаи «Барселона» дар бозии даври чоруми марҳилаи умумии Лигаи чемпионҳои УЕФА-2026/27 бар «Астон Вилла»-и Англия бо ҳисоби бузурги 3:0 пирӯз шуд.
Вохӯрии дастаҳо шаби 3-юми ноябр, дар варзишгоҳи «Камп Ноу»-и шаҳри Барселона баргузор гардид. Каталониҳо аз оғози бозӣ ташаббусро ба даст гирифта, дар дақиқаи 7-ум тавассути нимҳимоятгар Ламин Ямал ҳисобро кушоданд.
Дар қисми дуюми бозӣ ҳам мизбонон бартарии худро идома доданд. Дар дақиқаи 53-юм ҳамлагари «Барселона» Рафиня голи дуюми дастаашро ба самар расонд. Пас аз 12 дақиқа футболбози бразилӣ бори дигар муваффақ шуда, дублро ба номи худ сабт кард ва натиҷаи ниҳоии вохӯриро муқаррар намуд.
Ҳамин тариқ, «Барселона» дар майдони худ се имтиёзи муҳим ба даст овард. Дар даври оянда каталониҳо рӯзи 25-уми ноябр дар сафар бо дастаи «Сабоҳ»-и Озарбойҷон рақобат мекунанд. «Астон Вилла» бошад, як рӯз пештар дар шаҳри Истамбули Туркия бо «Галатасарой» рӯ ба рӯ мешавад.
Ёдовар мешавем, ки қаҳрамони феълии Лигаи чемпионҳои УЕФА бошгоҳи «ПСЖ»-и Фаронса мебошад. Дастаи шаҳри Париж дар финали мавсими 2025/26 бар «Арсенал»-и Лондон дар силсилаи зарбаҳои пеналтӣ бо ҳисоби 4:3 пирӯз шуда буд. Вақти асосии вохӯрӣ бо натиҷаи 1:1 анҷом ёфта буд.
Source: Varzish TV · varzishtv.tj
