БАРРАСИИ ПЕШНИҲОДИ РАЁСАТИ АГЕНТИИ НАЗОРАТИ ДАВЛАТИИ МОЛИЯВӢ ВА МУБОРИЗА БО КОРРУПСИЯИ ҶУМҲУРИИ ТОҶИКИСТОН ДАР ШАҲРИ ДУШАНБЕ

14 сентябр дар ҷаласаи назоратии назди Раиси ноҳияи Фирдавсии шаҳри Душанбе пешниҳоди раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар шаҳри Душанбе «Оид ба рафъи ҳолатҳое, ки ба содир шудани ҷиноят ва дигар қонуншиканиҳо мусоидат кардаанд» мавриди баррасии ҳамаҷониба қарор дода шуд.

Дар ҷаласа роҳбарият, масъулини дахлдори мақомоти иҷроияи ҳокимияти давлатии ноҳияи Фирдавсӣ ва воҳидҳои сохтории зертобеи он иштирок намуданд.

Дар рафти ҷаласа сардори шуъбаи тафтишотии раёсати Агентии назорати давлатии молиявӣ ва мубориза бо коррупсия дар шаҳри Душанбе Хайруллозода Абубакр Муҳаммадҷон ва муфаттиши калони шуъбаи тафтишотии раёсат Холзода Эраҷ Маҳмадулло иштирок намуда, муҳтавои пешниҳоди раёсат, сабабу омилҳои ба ҳолатҳои зикршуда мусоидаткунанда ва зарурати андешидани чораҳои иловагиро ба самъи ҳозирин расониданд.

Зимни баррасии масъала Холзода Э.М., таъкид намуд, ки пешгирии ҳама гуна омилҳои коррупсионӣ, таъмини шаффофияти фаъолияти хизматӣ, истифодаи мақсаднок ва самараноки маблағҳои давлатӣ, риояи интизоми молиявию хизматӣ ва таҳкими назорати дохилӣ аз ҷумлаи талаботи муҳими қонунгузории Ҷумҳурии Тоҷикистон ба ҳисоб меравад.

Аз ҷумла, дар доираи талаботи Қонуни Ҷумҳурии Тоҷикистон «Дар бораи муқовимат ба коррупсия» аз 7 августи соли 2020, №1714, ки асосҳои ташкилию ҳуқуқии муқовимат ба коррупсия ва чораҳои пешгирии ҳуқуқвайронкуниҳои коррупсиониро муайян менамояд, ба масъулини дахлдор зарурати пурзӯр намудани корҳои пешгирикунанда, бартараф намудани сабабу шароитҳои мусоидаткунанда ба қонуншиканиҳо ва таъмини иҷрои ҳатмии талаботи зиддикоррупсионӣ таъкид карда шуд.

Ҳамзамон, бо дарназардошти талаботи Қонуни Ҷумҳурии Тоҷикистон «Дар бораи идоракунии молиявӣ ва назорати дохилӣ дар бахши давлатӣ» аз 21 июли соли 2010, №626, ки низоми идоракунии молиявӣ ва назорати дохилиро дар ташкилотҳои бахши давлатӣ ба танзим медарорад, зарурати таҳкими механизмҳои назорати дохилӣ, пешгирии истифодаи ғайримақсадноки маблағҳо, таъмини нигоҳдории дороиҳо, дурустии ҳисоботҳои молиявию идорӣ ва риояи санадҳои меъёрии ҳуқуқӣ таъкид гардид.

Дар баробари ин, ҷиҳати таъмини дурустии баҳисобгирии молиявию муҳосибӣ ва ҳисоботдиҳӣ риояи ҳатмии талаботи Қонуни Ҷумҳурии Тоҷикистон «Дар бораи баҳисобгирии муҳосибӣ ва ҳисоботи молиявӣ» таъкид карда шуд. Қонуни мазкур асосҳои ташкилӣ ва ҳуқуқии пешбурди баҳисобгирии муҳосибӣ ва тартиби таҳияи ҳисоботи молиявиро муайян менамояд.

Ҳамзамон, иҷрои талаботи Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030, ки бо Фармони Президенти Ҷумҳурии Тоҷикистон аз 3 августи соли 2021, №222 тасдиқ гардидааст, ҳамчун яке аз самтҳои муҳими фаъолияти мақомоти давлатӣ дар самти пешгирӣ ва коҳиш додани хавфҳои коррупсионӣ арзёбӣ гардид. Стратегия муқовимат ба коррупсияро ҳамчун самти муҳими сиёсати давлатӣ муайян намуда, татбиқи чораҳои пешгирикунанда ва таҳкими механизмҳои назоратиро пешбинӣ менамояд.

Дар ҷаласа таъкид гардид, ки риояи санадҳои меъёрии ҳуқуқии соҳавӣ, таъмини шаффофияти фаъолияти молиявӣ, тақвияти назорати дохилӣ, пешгирии бархӯрди манфиатҳо, дуруст ба роҳ мондани ҳуҷҷатгузорӣ ва баҳисобгирии муҳосибӣ, инчунин истифодаи самараноку мақсадноки маблағҳои давлатӣ на танҳо вазифаи хизматӣ, балки талаби ҳатмии қонунгузории Ҷумҳурии Тоҷикистон мебошад.

Бо мақсади рафъи камбудиҳои дар пешниҳоди раёсати Агентӣ зикршуда, роҳбарони воҳидҳои сохторӣ ва масъулини дахлдор вазифадор гардиданд, ки ҷиҳати бартараф намудани сабабу шароитҳои мусоидаткунанда ба қонуншиканиҳо чораҳои мушаххас андешида, иҷрои талаботи қонунгузории амалкунанда, таҳкими назорати дохилӣ ва интизоми молиявию хизматиро таъмин намоянд.

Дар фарҷоми ҷаласа масъулини дахлдор вобаста ба масъалаҳои баррасишуда маслиҳату тавсияҳои мушаххас гирифта, барои иҷрои саривақтӣ ва пурраи талаботи қонунгузорӣ ва пешгирии такрори чунин ҳолатҳо вазифаҳои дахлдор муайян карда шуданд.

Таъкид гардид, ки мақомоти иҷроияи ҳокимияти давлатии ноҳияи Фирдавсии шаҳри Душанбе дар доираи ваколатҳои муқаррарнамудаи қонунгузорӣ минбаъд низ ба масъалаҳои таҳкими интизоми молиявӣ, шаффофияти фаъолияти хизматӣ, пешгирии коррупсия ва дигар қонуншиканиҳо, инчунин таъмини иҷрои санадҳои меъёрии ҳуқуқии Ҷумҳурии Тоҷикистон таваҷҷуҳи зарурӣ зоҳир хоҳад кард.