БАРГУЗОРИИ СЕМИНАРИ ОМӮЗИШӢ ОИД БА ХИЗМАТРАСОНИҲОИ РАҚАМӢ

15 сентябр дар Мақомоти иҷроияи ҳокимияти давлатии нохияи Синои шаҳри Душанбе бо ташаббуси Агентии инноватсия ва технологияҳои рақамии назди Президенти Ҷумҳурии Тоҷикистон семинари омӯзишӣ баргузор гардид.

Семинар ба масъалаҳои «Портали ягонаи хизматрасониҳои давлатӣ (e-khizmat.tj) ва ҳукумати электронӣ» бахшида шуда, дар он роҳбарият ва кормандони сохторҳои дахлдори мақомоти иҷроияи ҳокимияти давлатии ноҳияи Сино иштирок намуданд.

Дар рафти семинар ба иштирокчиён оид ба имконияту хизматрасониҳои Портали ягонаи хизматрасониҳои давлатӣ, тартиби истифодаи хизматрасониҳои электронӣ, нақши технологияҳои рақамӣ дар соддагардонии хизматрасониҳои давлатӣ ва рушди ҳукумати электронӣ маълумоти муфассал пешниҳод гардид.

Зикр гардид, ки ҷорӣ намудани хизматрасониҳои рақамӣ яке аз самтҳои муҳими сиёсати давлатӣ ба ҳисоб рафта, барои баланд бардоштани сифати хизматрасонӣ, сарфаи вақт ва коҳиш додани истифодаи ҳуҷҷатҳои коғазӣ заминаи мусоид фароҳам меорад.

Дар фарҷоми семинар иштирокчиён ба саволҳои худ посух гирифта, тавсияҳои заруриро ҷиҳати истифодаи самараноки имкониятҳои хизматрасониҳои электронӣ дар фаъолияти корӣ дарёфт намуданд.