Ҷашни Рӯзи Президенти Ҷумҳурии Тоҷикистон ва 30-солагии Иҷлосияи XVI Шӯрои Олии Ҷумҳурии Тоҷикистон дар Китобхонаи шаҳрии ба номи А.Лоҳутӣ

Бо ибтикори Раёсати фарҳанги шаҳри Душанбе дар Китобхонаи шаҳрии ба номи Абулқосим Лоҳутӣ чорабинии идона бахшида ба 30-солагии Иҷлосияи 16-уми Шӯрои Олии Ҷумҳурии Тоҷикистон ва Рӯзи Президенти Ҷумҳурии Тоҷикистон доир гардид.

Дар чорабинӣ роҳбарияту намояндагони Раёсати фарҳанги шаҳри Душанбе, доираи васеи олимони илму адаб иштирок намуда, доир ба нақши Президенти кишвар дар таҳкими давлатдорӣ ва аҳамияти Иҷлосияи 16-уми Шӯрои Олии Ҷумҳурии Тоҷикистон ибрози андеша намуданд.

Дар рафти суханронӣ иброз гардид, ки бо хизматҳои бузурги Асосгузори сулҳу ваҳдати миллӣ-Пешвои миллат Президенти Ҷумҳурии Тоҷикистон муҳтарам Эмомалӣ Раҳмон ҷумҳурии соҳибистиқлоламон дар дунё маъруфу сиёсати пешгирифтаи роҳбарияти мамлакат дастгирӣ ёфт.

Дар рафти суханронии намояндагон иброз гардид, ки дар марҳилаи нави бунёди давлати ҷавони Тоҷикистон тақдири баланди миллати куҳандиёри тоҷик дар симои шахсияти беназири таърихи Президенти Ҷумҳурии Тоҷикистон муҳтарам Эмомалӣ Раҳмон олитарин сифатҳои адолати инсонӣ, бузургдилию шуҷоат, раҳму шавқат ва қобилияти нотакрори ваҳдатофариро ато кард ва маҳз ҳамин ҳамоҳанги ҷомеаро ба сатҳи баланди хештаншиносӣ ҳидоят намуд.