Пешвои миллат Эмомалӣ Раҳмон дар шаҳри Душанбе бинои нави Литсейи равияи табиию риёзии Донишгоҳи миллии Тоҷикистонро мавриди баҳрабардорӣ қарор доданд

13 март дар шаҳри Душанбе Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бинои нави Литсейи равияи табиию риёзии Донишгоҳи миллии Тоҷикистонро мавриди баҳрабардорӣ қарор доданд.

Бинои нави замонавӣ аз чор ошёна иборат буда, барои 1280 нафар хонанда пешбинӣ гардидааст.

Сарвари давлат муҳтарам Эмомалӣ Раҳмон бо шароити фароҳамоварда шинос гардида, барои баланд бардоштани савияи донишу корбарии дуруст бо хонандагон ба масъулин маслиҳатҳои муфид доданд.

Иттилоъ дода шуд, ки иншооти мазкур дорои 47 синфхонаи замонавию барҳаво буда, барои таълиму тарбияи хонандагон синфхонаҳо бо тамоми аёнияти дарсӣ муҷаҳҳаз гардонида шудаанд. Инчунин дар Литсей 10 синфхонаи алоҳидаи фаннӣ барои омӯзиши химия, физика, биология, математика ва геометрия ташкил гардида, барои гузаронидани таҷрибаву озмоишҳо имконияти мусоид фароҳам мебошад. Дар ин баробар дарси омодагии дифои ҳарбӣ низ дар синфхонаи алоҳидаи муҷаҳҳаз гузаронида мешавад. Ба хотири соҳибҳунар намудани таълимгирандагон дар дохили бинои нав 3 синфхонаи алоҳидаи омӯзиши касбу ҳунар барои писарон ва духтарон ташкил гардида, дар ин ҷо онҳо малакаи кандакорӣ, дӯхти сару либос ва омодакунии ҳар гуна таъомро аз бар менамоянд. Ҳамчунин бинои нав дорои ҳуҷраи алоҳидаи тиббӣ бо тамоми дастгоҳҳои зарурии корӣ мебошад.

Тавре зимни боздид маълум гардид, дар иншооти мазкур барои китобхонии хонандагон шароити мусоид фароҳам оварда шудааст. Аз ҷумла, дар дохили бино китобхонаи алоҳидаи электронӣ, ки ба хати баландсуръати интернет пайваст аст, бунёд ёфта, ҳамчунин китобхонаи алоҳидаи анъанавӣ бо махзани бойи китобҳои фанниву бадеӣ ва толори барҳавои хониш ташкил гардидааст. Чунин шароит имконият медиҳад, ки толибилмон дар баробари дарс омӯхтан, ҳамчунин ба озмунҳои гуногуни ҷумҳуриявӣ, ки барои рушди китобдориву китобхонӣ равона гардидаанд, омодагии ҳамаҷониба бинанд.

Бинои нав ҳамчунин дорои ошхона бо 216 ҷой буда, толори маҷлисии он низ бо санъати баланд ва шароиту имконоти муосир бунёд гардидааст. Ин толор дорои 330 ҷойи нишаст буда, барои гузаронидани ҳамоишу чорабиниҳои фарҳангӣ мусоид мебошад.

Зимни боздид ба Сарвари давлат иттилоъ доданд, ки ба хотири рушди намудҳои гуногуни варзиш дар Литсей толори алоҳидаи варзишӣ бунёд ёфта, он барои навъҳои гуногуни варзиш, ҳамсони волейболу баскетбол ва футбол пешбинӣ гардидааст. Ҳамчунин дар назди бино ду майдони алоҳидаи дигари футболу волейбол ташкил гардидааст, ки барои гузаронидани тамринҳои гуногун мусоид мебошад.

Бинои нави Литсейи равияи табиию риёзии Донишгоҳи миллии Тоҷикистон бо пайгирӣ аз сиёсати бунёдкоронаи Сарвари давлат муҳтарам Эмомалӣ Раҳмон аз ҷониби соҳибкори ватанӣ Абдухалил Ғуломов бунёд гардида, ин иқдоми соҳибкор мушкилоти муассисаро дар самти фароҳам овардани шароити муосири таълимӣ пурра ҳал намуд.

Бояд гуфт, ки бинобар сабаби маҳдуд будани имконият дар бинои қаблӣ, дар Литсей ҳамагӣ 311 нафар ба донишомӯзӣ фаро гирифта шуда буд ва толибилмон танҳо аз синфи 5 то 11 дар ин муассиса дарс меомӯхтанд. Бо бунёди бинои нав имконият пайдо гардид, ки минбаъд хонандагон аз синфи 1 то 11 қабул гардида, дар шароити мувофиқ ба таълиму тарбия ба таҳсил фаро гирифта шаванд.

Бунёди бинои нави Литсейи равияи таббиию риёзӣ аз ҷумлаи тадбирҳои вобаста ба татбиқи “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” маҳсуб гардида, ба ин васила дар Литсей барои азбаркунии ҳамаҷонибаи илмҳои табиию риёзӣ имконияти мусоид фароҳам оварда шуд.

Бояд гуфт, ки иншоот бо санъати баланд бунёд гардида, дорои роҳравҳои барҳаво ва ороишоти зебову муосир мебошад. Таъмини гармӣ дар бино тариқи дегхонаи алоҳида роҳандозӣ гардидааст.

Намои берунаи иншоот бо санъати баланди меъморӣ оро ёфта, саҳни таълимгоҳ низ хеле зебост. Бахусус, дар атрофи таълимгоҳ дарахтони ороишӣ ва гулу буттаҳои рангоранг шинонда шуда, саҳни ҳавлии он чароғон карда шудааст. Корҳои сохтмонӣ бо истифода аз масолеҳи баландсифат ва сангҳои ороишии рангоранг сомон дода шудааст, ки ин имконият медиҳад Литсей солиёни зиёд ба толибилмон хизмат намояд.

Зимни боздид Президенти мамлакат муҳтарам Эмомалӣ Раҳмон ба сифати корҳои анҷомёфта баҳои баланд дода, иқдоми соҳибкорро намунаи ибрат ва қобили дастгирӣ арзёбӣ намуданд. Роҳбарият ва омӯзгорони Литсей вазифадор шуданд, ки шароити мазкурро хубу ҳамаҷониба истифода бурда, барои соҳибилм намудани кӯдакону наврасон садоқатмандона фаъолият намоянд.