ДАР ДУШАНБЕ НАХУСТНАМОИШИ ФИЛМИ МУСТАНАДИ «ФАСЛИ НАВИНИ ФУТБОЛ» БАРПО ШУД

11 август дар меҳмонхонаи «Ҳаятт Риҷенси Душанбе» нахустнамоиши филми мустанади «Фасли навини футбол», ки ба муваффақияту дастовардҳои футболи Тоҷикистон дар даҳ соли охир таҳти роҳбарии президенти ФФТ Рустами Эмомалӣ бахшида шудааст, баргузор шуд.

Филми ҳуҷҷатӣ бо ташаббуси бошгоҳи футболи «Истиқлол» ва шабакаи телевизионии «Варзиш» омода шудааст.

Меҳмонон аз Мақомоти иҷроияи ҳокимияти давлатии шаҳри Душанбе, Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Федератсияи футболи Тоҷикистон, Кумитаи миллии олимпии Ҷумҳурии Тоҷикистон, инчунин собиқадорони футбол, футболбозон, намояндагони ВАО, блогерон, мухлисон ва дигар меҳмонони сершумор дар маросими нахустнамоиши филм ширкат намуданд.

Дар филми «Фасли навини футбол» аз муваффақиятҳои футболи тоҷик дар солҳои охир ёдовар шудааст. Дар он мусоҳибаҳои вижа аз президенти ФИФА Ҷанни Инфантино, раиси Конфедератсияи футболи Осиё Шайх Салмон бин Иброҳим Ал-Халифа, собиқадорони зиёди футболи тоҷик - Шариф Назаров, Муҳсин Муҳаммадиев, Игор Черевченко, роҳбарони Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Кумитаи миллии олимпии кишвар, Федератсияи футболи Тоҷикистон, бошгоҳи футболи «Истиқлол» ва ғайра истифода шудаанд.

Қандил Мардонов

"ТВ Душанбе"