Тоҷикистон ба даври плей – офф роҳ ёфт

22 –юми январ дастаи мунтахаби Тоҷикистон бозии сеюми худро дар марҳилаи гурӯҳии Ҷоми Осиё-2023 муқобили тими миллии Лубнон анҷом дод. Ин дидор дар варзишгоҳи Ҷосим бин Ҳамади Доҳа баргузор шуда, бо ҳисоби 2 бар 1 ба фоидаи миллипӯшони тоҷик ба поён расид.  Дар нимаи аввали бозӣ ҳарду даста лаҳзаҳои хуби голзанӣ доштанд, вале аз онҳо истифода карда натавонистанд. Ҳарсе гол дар нимаи дуюми дидор зада шуд. Бассел Ҷрадӣ, бозигари мунтахаби Лубнон, дар дақиқаи 47-ум ҳисобро кушод. Вай тӯбро аз дохили ҷаримагоҳ бо зарбаи сахт ба дарвозаи Рустам Ятимов ворид кард. Парвизҷон Умарбоев, нимҳимоятгари мунтахаби Тоҷикистон, дар дақиқаи 80-ум ҳисобро баробар намуд. Тӯби аз масофаи дур ва берун аз ҷаримагоҳ задаи ӯ ба нишон расид. Голи дуюм ва ҳалкунандаи мунтахаби Тоҷикистонро Нуриддин Ҳамроқулов  аз дохили ҷаримагоҳ бо зарбаи сар ба самар расонид. Бояд гуфт, ки ду бори дигар тӯб вориди дарвозаи лубнониҳо гардида буд. Аммо сардовари ин бозӣ Муҳанад Қосим Саррай, довари 43-солаи FIFA (Федератсияи байнулмилалии футбол), аз Ироқ голҳои футболбозони тоҷикро ҳисоб накард.

Кӯмакдоварони ӯ (VAR) баъди тамошои видео ҳолати нобозӣ ё офсайдро ба қайд гирифтанд. Дар дақиқаи 56-ум сардовар баъди тамошои видео (VAR) бозигари мунтахаби Лубнон Қосим Ал-Зейнро, ки ба пойи рақибаш қасдан зад, корти сурх нишон дод. То охири дидор ҳайати тими миллии Лубнон аз даҳ нафар иборат буд. Дар ҳамин ҳол дар радабандии FIFA (Федератсияи байналмилалии футбол) дар байни 210 тими миллӣ мунтахаби Тоҷикистон мақоми 106-ум ва дастаи Лубнон мақоми 107-умро касб кардаанд. Ин аввалин бозӣ миёни ҳарду тими миллӣ буд.

Ҳамин тавр, футболбозони тоҷик бо 4 имтиёз дар гурӯҳи “А” мақоми дуюмро соҳиб шуда, ба даври плей-офф роҳ ёфтанд. Мунтахаби Тоҷикистон аввалин бор дар Ҷоми Осиё ширкат ва мекунад ва аввалин бор ба ин марҳилаи мусобиқот роҳ меёбад.

Ёдовар мешавем, ки Ҷоми Осиё дар Қатар бо иштироки 24 тими миллӣ ҷараён дорад. Дастаҳо ба шаш гурӯҳ тақсим шудаанд. Аз ҳар гурӯҳ ду дастаи пешсаф, инчунин чаҳор дастаи беҳтарин аз миёни ҷойҳои сеюм ба даври ҳаштякниҳоии Ҷоми Осиё-2023 роҳ меёбанд.