ҲАМОИШИ ВАРЗИШГАРОНИ ШАҲРИ ДУШАНБЕ ДАР РОБИТА БА ҲУНАРНАМОИИ ВОЛОИ ДАСТАИ МУНТАХАБИ КИШВАР ОИД БА ФУТБОЛ ДАР ҶОМИ ОСИЁ-2023

ш.Душанбе. 30.01.2024. Ҳамоиши варзишгарони шаҳри Душанбе дар робита ба қаҳрамонии бемисл нишон додани футболбозони тими миллии Тоҷикистон, ки мунтахаби Амороти Муттаҳидаи Арабро шикаст дода, ба даври чорякниҳоии Чемпионати Осиё-2023 роҳ ёфтанд, баргузор карда шуд.

Дар баргузории Ҳамоиш, муовини Раиси шаҳри Душанбе Одилзода Дилбар, муовини Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Собирзода Парвиз, ноиби Президенти Кумитаи миллии олимпии Тоҷикистон Дилшод Назаров ва дигар масъулину кормандони соҳаи варзиши мамлакат иштирок ва суханронӣ намуда, миннатдории худро ба Асосгузори сулҳу ваҳдати миллӣ, Пешвои миллат – Президенти Ҷумҳурии Тоҷикистон муҳтарам Эмомалӣ Раҳмон ва Президенти Федератсияи футболи Тоҷикистон, Раиси шаҳри Душанбе муҳтарам Рустами Эмомалӣ ҷиҳати дастгириҳои ҳамаҷониба дар самти рушду нумӯи варзиши мамлакат хусусан футбол баён доштанд.

Инчунин, бо мақсади иҷрои банди 17 Нақшаи чорабиниҳои “Барномаи рушди тарбияи ҷисмонӣ ва варзиш дар шаҳри Душанбе барои солҳои 2022-2026”, ки бо қарори Раиси шаҳри Душанбе аз 14 апрели соли 2022, №178 ва банди 36 Нақшаи чорабиниҳои “Барномаи рушди футбол дар шаҳри Душанбе барои солҳои 2022-2026” ки бо қарори Раиси шаҳри Душанбе аз 14 апрели соли 2022, №179 ба тасвиб расидааст, маросими қадршиносии беҳтаринҳо, варзишгарони мувафақ ва ташкилотҳои ҳамкор дар соҳаи варзиши шаҳри Душанбе дар соли 2023 доир гардида, “Мураббии беҳтарин”, “Варзишгари беҳтарин”, “Беҳтарин муассисаи варзишӣ”, “Толору клуби беҳтарин”, “Корманди беҳтарини сол дар самти варзиш”, “Футболбози беҳтарин”, “Довари беҳтарин”, “Телевизиони беҳтарин дар самти тарғиби тарбияи ҷисмонӣ ва варзиш”, “Наворбардори беҳтарин”, “Ровии беҳтарин” ва “Беҳтарин федератсияи варзишӣ” бо сипоснома, ҷом ва туҳфаҳои пулӣ сарфароз гардонида шуданд.