Душанбе – мизбони Чемпионати ҷаҳон

Рӯзҳои 30-31-уми август дар шаҳри Душанбе аввалин Чемпионати ҷаҳон оид ба гӯштии миллӣ – гӯштигирӣ доир мегардад.

Дар он зиёда аз 200 варзишгари 60 давлати ҷаҳон иштирок хоҳанд кард. Паҳлавонон дар 9 вазн - 3 вазн миёни занон ва 6 вазн миёни мардон зӯр меозмоянд. Фонди ҷоизавии чемпионат 400 ҳазор доллари ИМА аст. Дар ҳамаи вазнҳо ба ғолибон 20 000 доллар, барандагони медали нуқра – 10 000 ва медали биринҷӣ 5 000 доллари ИМА тақдим мешавад. Инчунин, дастаҳое, ки аз ҳисоби медалҳо се ҷои аввалро мегиранд, мутаносибан бо 5000, 3000 ва 2000 доллари ИМА сарфароз мегарданд.

Ба иттилои сармураббии тими мунтахаби гӯштигирии Тоҷикистон Хуршед Ибайдуллоев, ҷумҳурии моро 18 нафар – дар ҳар вазн дунафарӣ намояндагӣ мекунанд: Шаҳбоз Саидаброров, Муллораҷаб Халифаев (65 кг), Аҳмад Масъуд, Мирзоҷамил Рамазонов (71 кг), Раҳматуллобек Фарҳодов, Қоим Шукронов (78 кг), Умар Расулов, Ҳақназар Назаров (86 кг), Улуғбек Раҳимов, Кароматулло Ҳакимов (95 кг), Шариф Назриев, Шакармамад Мирмамадов (+95 кг) миёни мардҳо; Мадина Қурбонзода, Рӯзигули Ҳасан (52 кг), Ҷонона Назарова, Шоҳида Қаландарова (70 кг), Мавлуда Одинаева, Сабрина Холова (+70 кг) миёни бонувон.