Дар Маркази ҷумҳуриявии илмии саратоншиносӣ чорабинии дилхушӣ доир гардид

Дар доираи Нақшаи чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба Рӯзи ихтиёриён ва ё ба истилоҳ волонтёрон дар толори Муассисаи давлатии Маркази ҷумҳуриявии илмии саратоншиносӣ чорабинии дилхушӣ доир шуд.

Ровии маҳфил, ҳаҷвнигори маъруфи тоҷик Ҷамшед Ҳалимов бо салому шодбошиҳо ва хайрамақдам гуфтани ҳозирин барномаи фарҳангиро оғоз бахшид. Иштирокчиёни чорабинии фархангӣ наврасон ва волидони онҳо, кормандони Маркази ҷумҳуриявии илмии саратоншиносӣ ва аёдаткунандагон буданд. Барои фароғати иштирокдорон ҳунарманди ҷавон Мақсуд Дадаҷонов чашмбандиҳо иҷро кард. Барномаи намоишӣ ба кӯдакону наврасон писанд омад. Баъзе аз иштирокчиён дар ҷараёни чорабинии фарҳангӣ ба саҳна баромада, амалҳои сеҳру чашмбандиро дар ҳамбастагӣ иҷро намуданд.

Пайдо ва нопадид кардани матоъ дар даст, бастани руймол ва кушодани гиреҳ бидуни иҷрояи ягон амал, зинда шудан ва парвоз кардани кабӯтар аз расм ва иҷрои дигар чашмбандиҳо дар ҳунарнамоии Мақсуд Дадаҷонов табъу руҳи ахли толорро болида кард.

Дар идомаи маҳфили фраҳангӣ ҳунармандони Театри давлатии ҷавонони Тоҷикистон ба номи Маҳмудҷон Воҳидов саҳначаи “Харгӯшаки доно”-ро пешкаши тамошобинони хурдсол карданд, ки саропо ифодагари чолокиву зиракӣ ва доноиву хушёрӣ буд.

Дар чараёни чорабинии фарҳангӣ туҳфаҳои омоданамудаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба кӯдакону наврасоне, ки дар Маркази ҷумҳуриявии илмии саратоншиносӣ табобат мегиранд, тақдим карда шуд.

Умедчон Сайдиллоев
"ТВ Душанбе"