БАРГУЗОРИИ ДАВРИ ШАҲРИИ ОЗМУНИ СТИПЕНДИЯҲОИ РАИСИ ШАҲРИ ДУШАНБЕ

11.04.2024, 11:25 0 286

ш.Душанбе. 08.04.2024. Имрӯз дар толори компютерии Муассисаи давлатии “Маркази технологӣ ва иттилоотӣ”-и назди Сарраёсати маорифи шаҳри Душанбе зери роҳбарии муовини Раиси шаҳри Душанбе, Раиси Комиссияи озмуни стипендияҳои Раиси шаҳри Душанбе барои соли хониши 2023-2024 даври шаҳрии “Озмуни стиендияҳои Раиси шаҳри Душанбе” баргузор гардид, ки дар маросими ифтитоҳи озмуни мазкур аъзои Комиссияи шаҳрӣ ва ҳайати экспертии озмун иштирок намуданд.

Муовини Раиси шаҳри Душанбе Одилзода Дилбар бо довталабони рӯзи аввали озмуни мазкур, ки донишҷӯёни муассисаҳои таҳсилоти олии ҳудуди шаҳри Душанбе буданд, дар синфхонаи компютерӣ мулоқот доир намуда, ба онҳо ҷиҳати ғолиб гардиданашон дар озмун барору комёбӣ таманно намуд.

Инчунин, тибқи ҷадвали баргузории озмун, санаи 8 апрели соли ҷорӣ озмун миёни донишҷӯёни муассисаҳои таҳсилоти олии ҳудуди шаҳри Душанбе бо фарогирии 163 нафар, рӯзи 9 апрел миёни донишҷӯёни муассисаҳои таҳсилоти ибтидоӣ ва миёнаи касбии ҳудуди шаҳр бо фарогирии беш аз 30 нафар ва рӯзҳои 11-13 миёни хонандагони муассисаҳои таҳсилоти миёнаи умумӣ ва литсею гимназияҳои шаҳри Душанбе бо фарогирии беш аз 500 нафар довталабон аз ҳисоби ғолибони даври ноҳиявии озмуни стипендияҳои Раиси шаҳри Душанбе баргузор карда шуда, ғолибони озмун дар натиҷаи ҷамъбасти кори Комиссия тавассути саҳифаҳои Раисии Мақомоти иҷроияи ҳокимияти давлатии шаҳри Душанбе ва сохторҳои маориф ва кор бо ҷавонон ва варзиши шаҳри Душанбе эълон мегарданд.

Иттилоъ медиҳем, ки бо мақсади таъмини иштироки фаъолонаи донишҷӯёни муассисаҳои таҳсилоти ибтидоӣ ва миёнаи касбӣ дар толори муассисаи болозикр зери роҳбарии муовини Раиси шаҳри Душанбе Одилзода Дилбар бо ҳайати Комиссияи даври шаҳрӣ, Комиссияи экспертӣ ва директорони Коллеҷу омӯзишгоҳҳои ҳудуди шаҳри Душанбе ҷаласаи корӣ доир гардида, ба масъулин дастуру супоришҳои мушаххас дода шуд.