ТАҚДИМИ ШАҲОДАТНОМАҲОИ ТАВАЛЛУД ДАР РӮЗИ БАЙНАЛМИЛАЛИИ ОИЛА ДАР ПОЙТАХТ

15.05.2024, 14:01 0 144

ш.Душанбе. 15.05.2024. Имрӯз бо ташаббуси Мақомоти иҷроияи ҳокимияти давлатии шаҳри Душанбе, дар доираи баргузории чорабиниҳо бахшида ба “Рӯзи байналмилалии оила” дар Муассисаи давлатии “Таваллудхонаи шаҳрии №2”, шуъбаи таваллуди Муассисаи давлатии “Маҷмааи тандурустии Истиқлол” ва шаҳраку маҳаллаҳои ноҳияҳои пойтахт аксияи тақдими шаҳодатномаҳои таваллуд баргузор гардида, ба 24-нафар кӯдакони навзод шаҳодатномаи таваллуд ва ба модарони кӯдакони навзод туҳфаҳои хотиравӣ тақдим карда шуданд.

Мақсад аз роҳандозӣ намудани аксияи мазкур, баланд бардоштани маърифати оиладорӣ, масъулияти падару модарон дар таълиму тарбияи фарзанд, ба камол расонидани фарзандон дар руҳияи ватандӯстию меҳанпарастӣ ва дар фазои муҳаббату якдигарфаҳмӣ мустаҳкаму пойдор нигоҳ доштани оила ба ҳисоб меравад.

Бояд гуфт, ки оила дар фарҳанги мардуми куҳанбунёди тоҷик ҳамчун ниҳоди муқаддас эътироф гардидааст, зеро беҳтарин арзишҳои инсонӣ, аз қабили муҳаббату садоқат, самимияту вафодорӣ ва ҳамдигарфаҳмиву таҳаммулгароӣ маҳз дар оила ташаккул меёбад. Оила яке аз рукнҳои муҳими ҷомеа ва давлат, ҳамзамон, парваришгоҳи аслии насли башар аст, ки тариқи он ҳифзу бақои инсоният таъмин мегардад.

Ёдовар мешавем, ки ҳамасола 15 май дар ҷаҳон Рӯзи байналмилалии оила таҷлил карда мешавад, ки он соли 1994 бо қарори Ассамблеяи Генералии Созмони Милали Муттаҳид эълон гардидааст.