Дар ноҳияи Исмоили Сомонӣ мусобиқаи футболи хурд байни донишҷӯёни муассисаҳои олии таълимии ҳудуди ноҳия доир гардид

Бахшида ба 30 солагии ҲХДТ ва бо мақсади дар амал татбиқ намудани сиёсати созандаю бунёдкорона ва тарбияи худшиносиву ватандӯстии ҷавонон аз ҷониби Кумитаи иҷроияи Ҳизби Халқии Демократии Тоҷикистон дар ноҳияи Исмоили Сомонӣ мусобиқаи футболи хурд байни донишҷӯёни муассисаҳоии олии таълимии ҳудуди ноҳия дар Гимназияи ба номи Асадулло Ғуломов доир гардид.

Мақсад аз баргузории мусобиқаи варзишӣ, тарғиби  тарзи ҳаёти солим ва тарбияи ҷисмонии ҷавонон, баланд бардоштани маҳорати варзишӣ, дарёфти варзишгарони бомаҳорат, мустаҳкам намудани робитаи дӯстӣ байни ҷавонон мебошад.

Дар мусобиқа донишҷӯёни Академияи идоракунии давлатии назди Президенти Ҷумҳурии Тоҷикистон, Филиали Донишгоҳи давлатии Москва ба номи М. В. Ломоносов дар шаҳри Душанбе, Донишгоҳи давлатии омӯзгории Тоҷикистон ба номи Садриддин Айнӣ, Донишгоҳи славиянии Тоҷикистону Россия ва Донишкадаи исломии Тоҷикистон иштирок доштанд.

Дар раванди мусобиқа ғолибон муайян гардиданд. Ҳамин тариқ дастаи Академияи идоракунии давлатии назди Президенти Ҷумҳурии Тоҷикистон сазовори ҷойи аввал, бозигарони Филиали Донишгоҳи давлатии Москва ба номи М. В. Ломоносов дар шаҳри Душанбе сазовори ҷойи дуюм ва донишҷуёни Донишгоҳи славиянии Тоҷикистону Россия ба гирифтани ҷои сеюм даст ёфтанд.

Ғолибон бо медал ва туҳфаҳои хотиравӣ аз ҷониби масъулини Кумитаи иҷроияи ҲХДТ дар ноҳияи Исмоили Сомонӣ қадрдонӣ карда шуданд.

Ғунчагул Нурализода
"ТВ Душанбе"