Озмуни шаҳрии "Тоҷи сари ҷумла ҳунарҳост илм" баргузор мешавад

Ҷиҳати иҷрои банди 5-и нақашаи кори Мақомоти иҷроияи ҳокимияти давлатии шаҳри Душанбе ва мутобиқи моддаҳои 19 ва 20-и Қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ» қарори Раиси шаҳри Душанбе «Дар бораи ташкил ва баргузор намудани озмуни шаҳрии «Тоҷи сари ҷумла ҳунарҳост илм» ба тасвиб расид.

Дар қарор омадааст, ки дар соли 2025 байни хонандагони муассисаҳои таҳсилоти миёнаи умумии шаҳри Душанбе озмуни шаҳрии «Тоҷи сари ҷумла ҳунарҳост илм» ташкил ва баргузор карда шавад.

Низомнома, ҳайати комиссия, ҳайати ҳакамон ва харҷномаи озмуни шаҳрии «Тоҷи сари ҷумла ҳунарҳост илм» тасдиқ карда шуда, муовини Раиси шаҳри Душанбе - сарпарасти соҳа, раисони ноҳияҳои шаҳри Душанбе, шуъбаи рушди иҷтимоӣ ва робита бо ҷомеаи дастгоҳи Раиси шаҳри Душанбе ва Сарраёсати маорифи шаҳри Душанбе вазифадор гардидаанд, ки барои дар сатҳи баланди ташкилӣ баргузор намудани озмуни шаҳрии «Тоҷи сари ҷумла ҳунарҳост илм» тадбирҳои амалӣ андешанд.