Тантанаи идона ба муносибати Рӯзи Модар дар ноҳияи Исмоили Сомонӣ

Ба муносибати Рӯзи Модар дар мақомоти иҷроияи ҳокимияти давлатии ноҳияи Исмоили Сомонии шаҳри Душанбе чорабинии тантанавии идона баргузор гардид.

Дар чорабинӣ собиқадорони меҳнат, фаъолзанони кишвар ва ноҳияи Исиоили Сомонӣ ва кормандзанони дастгоҳи раиси ноҳияи Исмоили Сомонӣ иштирок намуданд. Зимни табрикоти худ Раиси ноҳияи Исмоили Сомонӣ изҳор дошт, ки дар нахустин рӯзҳои фасли зебои баҳор, яъне айёми нуру сафо ва гармиву бедории табиат — ҷашни фархундаи Рӯзи модар фаро мерасад. Модар ягона мавҷудест, ки инсон меофарад, ба ӯ ҳаёт мебахшад, ӯро дар оғӯши гарму пурмеҳри худ мепарварад, аввалин суханҳо ва гузоштани нахустин қадамҳоро ба тифлаш ёд медиҳад, фарзанди хешро бо ҳазор нияту орзуҳои нек ба воя мерасонад.

Зан - Модар чашмаи софу зулол ва нурбахши ҳаёт буда, чун гулҳои зебои баҳор рӯзгорро муаттару мунаввар мегардонад. Ниҳоди поки модар шабеҳи насими рӯҳбахши ҳаёт аст, ки ба ҳастию рӯзгори мо тароват, меҳру садоқат ва дӯст доштани зиндагиро мебахшад. Дар ин замина ба тамоми иштирокчиёни чорабинии тантанавии имрӯза туҳфаҳои идонаи раиси ноҳияи Исмоили Сомонӣ тақдим карда шуд.

Дар чорабинӣ кормандони фаъоли бахши маорифи ноҳияи Исмоили Сомонӣ, собиқадорони соҳаи маориф, раисони Шӯроҳои шаҳраку маҳаллаҳои ноҳия ва кормандони мақомоти иҷроияи ҳокимияти давлатии ноҳияи Исмоили Сомонӣ иштирок намуданд.

Мавриди зикр аст, ки Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон мақому мартабаи модарону бонувони тоҷикро дар ҷомеа шоиста дониста, арз медоранд, ки “Модар гаронбаҳотарин дороии як миллат аст ва ба андозае арзиш дорад, ки метавон гуфт: Ҷомеа замоне ба авҷ мерасад, ки битавонад аз кор ва кирдорҳои модар пуштибонӣ кунад”.

Бояд қайд кард, ки дар ноҳияи Исмоили Сомонии шаҳри Душанбе имрӯзҳо зиёда аз 75 ҳазор занон истиқомат намуда, шумораи зиёди онҳо бо ҳисси баланди масъулият дар сохторҳои гуногун ҳокимияти халқ адои хизмат намуда истодаанд.

Валиҷон Шарифзода
"ТВ Душанбе"