Ба муносибати ҷашни "Рӯзи модар" хатсайри сайёҳӣ ташкил карда шуд

Бо ташаббуси Мақомоти иҷроияи ҳокимияти давлатии шаҳри Душанбе бахшида ба Рӯзи модар барои занон - модароне, ки дар тозагии кӯчаву хиёбонҳои пойтахт ва муҳити озодаи он саҳми назаррас доранд, хатсайри сайёҳӣ ташкил карда шуд. Ҳадаф аз баргузории хатсайр қадршиносӣ ва эҳтиром гузоштан ба меҳнати шабонарӯзии ин занон - модарон мебошад.

Дар доираи хатсайр аз ҷониби роҳбаладон вобаста ба имкониятҳои сайёҳии шаҳри Душанбе маълумоти муфассал пешниҳод гардида, ҳангоми саёҳат ба иштирокчиён барои саҳми арзанда гузоштан дар тозаву озода нигоҳ доштани кӯчаву хиёбонҳои пойтахти кишвар изҳори сипос карда шуд.

Хатсайри сайёҳӣ аз назди Майдони 80-солагии Москва, назди Театри давлатии академии опера ва балети ба номи С.Айнӣ оғоз гардида, ба самти Майдони Истиқлол ва Осорхонаи таърихии Душанбе ҳаракат намуд. Иштирокчиён аз осорхонаи мазкур низ дидан намуданд.

Модарон инчунин зимни тамошои толорҳои Осорхона бо ёдгориҳои нодири таърихии ниёгон ва дастовардҳои замони соҳибистиқлолии мамлакат аз наздик шинос шуданд.

Ба хотири болидаруҳии иштирокчиёни хатсайр бо иштироки ҳунармандон барномаҳои фарҳангӣ пешниҳод гардида, ба онҳо ширинӣ ва гулҳои тару тоза тақдим карда шуд. Дар идома ба ширкатдорони ин хатсайри сайёҳӣ туҳфаҳои хотиравӣ тақдим карда шуд.

Меҳринисо Раупова
"ТВ Душанбе"