Дар шаҳри Душанбе даври сеюми Озмуни ҷумҳуриявии «Тоҷикистон-Ватани азизи ман» оғоз гардид

Дар шаҳри Душанбе даври сеюми Озмуни ҷумҳуриявии «Тоҷикистон-Ватани азизи ман» оғоз гардид, ки то 30 сентябр идома меёбад. Дар даври сеюми Озмуни ҷумҳуриявии «Тоҷикистон-Ватани азизи ман» 525 довталаб аз тамоми шаҳру ноҳияҳои мамлакат иштирок мекунад. Бояд гуфт, ки дар даври якуми озмун 5302 довталаб иштирок карда, 2755 иштирокчӣ ба даври дуюм роҳхат гирифт. Таҳлили ҷамъбасти даври якум нишон медиҳад, ки иштироки довталабон нисбат ба ҳамин давраи соли 2023 860 нафар зиёд аст.

Аз 25 то 27 сентябри соли равон дар Муассисаи давлатии Осорхонаи миллии Тоҷикистон маросими даври ниҳоии Озмуни ҷумҳуриявии «Тоҷикистон-Ватани азизи ман» баргузор мешавад. Ин Озмун истеъдодҳои хосро аз тамоми гӯшаҳои кишвар ҷамь овардааст, ки дастовардҳои гуногуни фарҳанги тоҷикро рӯнамоӣ мекунанд.

Озмуни мазкур бо мақсади пайдо кардани истеъдодҳои нав дар соҳаҳои мусиқӣ ва овозхонӣ, рассомӣ ва дизайн, баланд бардоштани касбият, тарғиб ва эҳё кардани ҳунарҳои мардумӣ, инчунин нишон додани фарҳанги қадимаи миллати тоҷик гузаронида мешавад.

Дар ҳунарҳои дастии ҳар як иштироккунанда инъикосе аз нақшу нигори миллиро дидан мумкин аст, аз қабили либосҳои миллие ки тарроҳони ҷавон дӯхтаанд, зарфҳои гилӣ, ки бо нақшу нигори миллӣ оро дода шудаанд. Ҳамчунин наққошиҳои ҳунарӣ ва тарҳҳои графикии маҳсулотҳои гуногун аз ҷониби иштирокчиён ба намоиш гузошта шудаанд. Озмун воқеан як ҷашни эҷодкорие гаштааст, ки дар он ҳар як иштироккунанда ҳиссаи худро дар ҳифз ва рушди фарҳанги миллӣ мегузорад.

С.Гулова
"ТВ Душанбе"