Анҷоми сафари расмии Президенти Ҷумҳурии Тоҷикистон Эмомалӣ Раҳмон дар Ҷумҳурии Қазоқистон

7 ноябр сафари расмии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, ки рӯзҳои 5-7 ноябр дар Ҷумҳурии Қазоқистон ҷараён дошт ба анҷом расид.

Ёдовар мешавем, ки зимни ин сафар Роҳбари давлат муҳтарам Эмомалӣ Раҳмон, ҳамчунин, дар Иҷлосияи Ақаба иштирок ва суханронӣ намуданд.

Дар доираи сафари расмӣ мулоқоту музокироти сатҳи оли Тоҷикистону Қазоқистон доир гардида, зимни он маҷмуъи масоили ҳамкорӣ баррасӣ шуд.

Аз рӯйи натиҷаи музокирот 20 санад ва форуми соҳибкорони ду кишвар 25 санади нави ҳамкорӣ ба маблағи умумии 2, 5 миллиард доллари амрикоӣ ба имзо расид.

Дар фурудгоҳи байналмилалии ба номи Нурсултон Назарбоев меҳмони олимақом Президенти Ҷумҳурии Тоҷикистон муҳтарам Эмомалӣ Раҳмонро бо нишони эҳтирому самимияти баланд Президенти Ҷумҳурии Қазоқистон муҳтарам Қосим-Жомарт Тоқаев гусел намуданд.

Нимаи дуюми рӯзи 7 ноябр Роҳбари давлат муҳтарам Эмомалӣ Раҳмон аз шаҳри Остона ба Ватан баргаштанд.